Aniga oo ah Cumar Muuse Caalin, guddoomiyihii loo doortay guddida fulinta ee ururka Laasdhuure, waxaan halkan idin kula wadaagayaa tadawurkii iyo sooyaalkii ururka oo kooban, heerarkii kala duwanaa ee ururku soo maray tan iyo markii hawshiisu bilaabantay, iyo halkan uu maanta marayo sidii uu ku soo gaadhay.
Ururka Laasdhuure; waxa ay hawshiisu bilaabantay 3/April/2024, xilligaasi waxa uu ku bilaabmay su’aal ay is-weydiiyeen xubnaha ururka qaarkood, su’aashaasi oo u dhignayd:
Hadii aynu reer Maxamuud Yoonis nahay, innaga oo ka faa’iideysanayna technology-adda iyo aaladaha casriga ah, ma u baahan nahay bar aynu ku kullano (WhatsApp Group), oo xogta iyo hadba wixii soo kordha aynu ku kala qaadanno?
Su’aashaasi xubnihii is-weydiiyay waxay kaga falceliyeen “Haa Weynu U Baahan Nahay“
Kadibna halkaasi ayaa ay hawshii hore uga sii socotay, hawshiina ay u noqotay mid ay ku soo biireen rag badan oo reerka ka mid ah, ilaa tiradii xubnuhu ay kor u dhaaftay 50-xubnood.
Falanqayn, fikir is-weydaarsi, dood iyo xog-urrurin ayaa socotay bishii Ramadaan ee sanadkan 2024 oo dhan, taasi oo u dhexeysay xubnihii xilligaasi hawsha ku jiray, ujeedaduna waxay ahayd in ay gorfeeyaan nooca iyo yoolka hawsha ama barta WhatsaApp Group ka waxa looga faa’iideysanayo ee loo adeegsan doono.
Hadii aynu xusno ama wax ka sheegno doodihii socday bishii ramadaan ee sanadkan 2024, waxa nuxurkoodu noqday sidan:
MAXAA KA SOO BAXAY KULANKEENII 1AAD
Kulankeenii 1aad oo ajandihiisu ahaa in laga soo jawaabo weydiimahan:
1- Qof kasta waa inuu iskeen baro oo sheego magaciisa, halka uu degan yahay iyo wixii kale ee uu raacin karo?
2- Qof kasta waa inuu fikirkiisa ka dhiibto sida uu u arko Bar-kulankani, wixii talo ama tusaale ama qorshe ah ee uu hayana inala wadaago?
✍ Waxaynu kulankaasi ku galnay 46 qof.
✍ Waxa ka qayb qaatay kulankaasi oo fikirkooda ka dhiibtay 36 qof.
✍ Waxa ka aamusay oo aan ka qayb gelin kulankaasi 10 qof.
✍ Waxa ‘Haa’ ku codeeyay ama taageero u muujiyay barkulanka iyo baahida aynu u qabno 33 qof.
✍ Waxa diiday ama su’aal ka keenay barkulankan iyo sii-wadidiisa 3 qof.
✍ Waxa %70 dadka soo jawaabay ay dhayilsadeen ama si aan waafi ahayn uga hadleen qodobka is-barashadeena, in qof kasta isbaro inta kale.
✍ Waxa %20 dadka qoraalka kusoo jawaabay aanay xil iska saarin hab-qoraalkooda si loo fahmi karo waxa ay ka hadlayaan.
✅ Gunaanad:
Kulankeenii 1aad waxaynu aqlabiyad ku ogolaanay jiritaanka iyo sii-wadida barkulankan.
Wabilaahi Tawfiiq.
MAXAA KA SOO BAXAY KULANKEENII 2AAD
Kulankeenii 2aad oo ajandihiisu ahaa in laga soo jawaabo weydiimahan:
1- Maxaynu xooga saarnaa, oo barkulankani uga faa’iideysannaa, maadaama oo baylahda iyo baahiyaha reerkeenu badan yihiin?
2- Fikirkaaga ka dhiibo nooca guddida bartani inoo daadahayn doonta iyo qaab-doorashadooda?
✍ Waxaynu kulankaasi ku galnay 73 qof.
✍ Waxa ka qayb qaatay kulankaasi 22 qof.
✍ 4 qof ayaa kulankii oo dhamaaday doodooda dhiibtay.
✍ Waxa ajandihii kulanka inoogu qornaa hadalkooda ku fadhiisiyay 20 qof.
✍ Waxa ajandihii kulanka inoogu qornaa ka leexday, oo si guud u hadlay 6 qof.
✍ Waxa ka aamusay oo aan ka qayb gelin kulankaasi 47 qof.
✅ Gunaanad:
Labadii weydiimood ee kulankeena 2aad ajandaha u ahaa, waxa jawaabihii laga soo bixiyay noqdeen sidan:
Weydiinta 1aad oo ahayd; maxaynu xooga saarnaa, oo barkulankan uga faa’iideysannaa, waxa jawaabteedii ku soo ururtay:
- In aynu barkulankani uga faa’iideysanno arrimaha bulshada, sida caawinta dadkeena hadii ay noqoto xaga nolosha iyo xaga waxbarashada iyo xaga caafimaadkaba.
- In barkulankani aynu uga faa’iideysanno xog-ururinta dadkeena iyo deegaanadeenaba.
- In barkulankani aynu uga faa’iideysanno is-barashada dhexdeena.
Weydiinta 2aad oo ahayd; guddida inoo daadahaynaysa bartani nooceeda iyo qaab-doorashadeeda, dadka ka soo jawaabay way yar yihiin, weliba badi inta ka soo jawaabtayna si guud ayay uga hadleen, waxaana jawaabteedu ku soo ururtay:
- In guddi ku-meeel-gaadh ah la magacaabo, oo ay iyagu soo diyaariyaan nooca iyo qaabka ay guddida rasmiga ahi noqonayso.
- In qofkii raba inuu guddida ka mid noqdaa is-sheego iyo in qofba qofkii uu isleeyahay wuu ku soo baxayaa guddidaasi uu soo sheego.
Wabilaahi Tawfiiq.
MAXAA KA SOO BAXAY KULANKEENII 3AAD
Kulankeenii 3aad oo ajandihiisu ahaa in laga soo jawaabo weydiimahan:
1- Maxaa sababay ama ay kula tahay in xubno badan oo barkulankeenan ku jiraa, ay ka soo hadli waayaan ama fikirkooda ku biirin waayaan wixii wanaaga reerkeenu ku jiray?
✍ Waxaynu kulankaasi ku galnay 83 qof.
✍ Waxa ka qayb qaatay kulankaasi 20 qof.
✍ Waxa hadalkoodu ku fadhiyay ajandihii kulanka inoogu qornaa 11 qof.
✍ Waxa ka leexday ajandihii kulanka inoogu qornaa, oo si guud u hadlay 9 qof.
✍ Waxa ka aamusay oo aan ka qayb gelin kulankaasi 63 qof.
✅ Gunaanad:
Weydiintii kulankeena 3aad ajandaha u ahayd, waxa jawaabihii laga soo bixiyay ay noqdeen sidan;
Dadka aan ka qayb gelin doodaha barkulankeena waxa aamuskooda sabab u ah:
- Dadka badan oo aamuskoodu yahay Haa, raalina ku ah sida ay wax u socdaan, sidii lagu taliyana diyaar u ah.
- Dadka qaarkood oo aan la haysan hawlaha reerka, oo dhowraya halka xaalku biyo dhigto.
- Dadka qaarkood oo aan la baraarujin ama aan loo sheegin sida wax loo wado, oo qof inaga mid ahi uun number-kooda ku soo daray.
- Dadka qaarkood oo aan u bislayn ka-hadalka baraha bulshada.
- Dadka qaarkood oo xog-ogaal ah, oo u arka arrimaha cakiran ee reerkeena ka jira in aan sidan loo maareyn kareynin.
- Dadka qaarkood oo ka niyadjabsan group-da baraha bulshada oo inta badan loo sameysto dano gaar ah, sida; siyaasada iwm.
- Dadka qaarkood oo quus ka jooga hawlaha reerka, kadib markii isku dayo badan oo wanaagsan oo ay sameeyeen fuli waayeen.
Wabilaahi Tawfiiq.
MAXAA KA SOO BAXAY KULANKEENII 4AAD
Kulankeenii 4aad oo ajandihiisu ahaa in ay dhageysanno xog-warranka group-deenii hore, kuwaasi oo kala ahaa:
- Group-ka Gabax Foundation
- Group-ka Geed-deeble (Iclaamka kadib ayaanu ku soo darnay)
- Group-ka Wadajir
- Group-ka Galsaxar
- Group-ka Tawfiiq
✍ Waxaynu kulankaasi ku galnay 97 qof.
✍ Waxa xog-warranka inoogu qornaa 7 qof.
✍ Waxa xog-warrankii aynu ka sugaynay innala wadaagay 6 qof.
✍ Waxa si guud u hadlay, oo group-kii aynu xog-warrankiisa ka sugaynay aan inooga warramin 1 qof.
✍ Waxa ka aamusay xog-warrankii aynu ka sugaynay 1 qof.
✅ GUNAANAD:
Falanqaynta Group-deenii hore taasi oo kulankeena 4aad ajande u ahayd, waxa xogtii laga soo bixiyay ay noqotay sidan;
Group-ka Gabax Foundation:
- Ujeedada loo aasaasay: Mideynta Bahgobo
- Tirada Xubnaha: 300
- Qaab-daadahaynta: Wada-tashi xubnaha u dhexeeya
- Maxaa u qabsoomey: Is-dhexgalka reerka iyo sameynta urur-hoosaadyo dhallinyarada, haweenka iyo odeyada
- Caqabadaha ka hor yimid: Biseyl la’aanta xubnaha, dhaqaale-xumo iyo siyaasad soo dhex gashay
Group-ka Wadajir:
- Ujeedada loo aasaasay: Qaadhaanka oo odeyada laga taageero iyo mideynta reer Maxamuud
- Tirada Xubnaha: 200
- Qaab-daadahaynta: Wada-tashi xubnaha dhexdooda ah
- Maxaa u qabsoomey: Sameynta sanduuqa qaadhaanka, is-dhexgalka reerka iyo ururinta woxogaa qaadhaan ah
- Caqabadaha ka hor yimid: Nidaam-xumo xaga ururka, is-kooxaysiga reerka ka dhex jira, dhaqaale-xumo, wada-gaadhid la’aan haldoorka reerka iyo dano shakhsi oo soo dhex gashay
Group-ka Galsaxar:
- Ujeedada loo aasaasay: Taageerid waxbarashada reerka
- Tirada Xubnaha: 25
- Qaab-daadahaynta: Wada-tashi xubnaha oo Jimce kasta ahaa
- Maxaa u qabsoomey: Sameynta qorshe ururka lagu hago iyo woxogaa xog-ururin ardeyda reerkeena ah
- Caqabadaha ka hor yimid: Ka-qaybgal la’aanta xubnaha, xog la’aan, dhaqaale la’aan, siyaasad soo gashay iyo hogaankii oo gaabis shaqo ay ku timid
Group-ka Tawfiiq:
- Ujeedada loo aasaasay: Xallinta khilaafka odeyada dhaqanka ka dhex jira
- Tirada Xubnaha: 9
- Qaab-daadahaynta: Adeegsiga xeer-hoosaad iyo kullamo fool ka fool ah
- Maxaa u qabsoomey: Helitaanka kalsoonida sideeda odey iyo caaqilka
- Caqabadaha ka hor yimid: Wada-shaqeyn la’aan ama diidmo ka timid xaga odeyada qaarkood
Group-ka Geeddeeble:
- Ujeedada loo aasaasay: …
- Tirada Xubnaha: …
- Qaab-daadahaynta: …
- Maxaa u qabsoomey: …
- Caqabadaha ka hor yimid: …
Wabilaahi Tawfiiq.
Natiijadii kulan-doodeedyadaasi online-ka ku baxayay, waxa ka dhashay laba arrimood:
- In la qabto doorasho qof iyo cod ah, oo xubnaha ururka lagu weydiinayay, waxa loo adeegsan doono ururkan, iyo baylahda reerkeena barta uu ururku kaga beegmayo.
- In ay soo baxaan guddidii u horeysay oo 10-xubnood ka koobnayd, ahaydna guddi ku-meel-gaadh ah, oo isu-xilsaartay in ay hawsha halkaasi ka sii dhaqaajiyaan.
Doorashadii xubnaha ururka ugu codeeyeen ujeedada ururku ku hawlgeli doono, waxa natiijadeedii noqotay in xubnihii ugu badnaa ay u codeeyeen, in ururku xooga saaro arrimaha horumarinta waxbarashada, iyo sidii dhallinyarta reerka looga kaabi lahaa dhanka aqoonta.
Guddidii 10-ka xubnood ahayd ee xilkoodu kumeelgaadhka ahaa, ayaa iyaguna hawsha bartaa ka sii dhaqaajiyay, waxay iska dhex doorteen 5-xubnood oo ay u xilsaareen in ay soo qoraan (draft) xeerkii ururka, kadibna xeerkii oo 10-xubnood ee guddidu soo saxeexeen, ayay u soo gudbiyeen xubnihii guud ee ururka, iyada oo qabyo-qoraalkii xeerka la soo dhigay barta WhatsApp-ka ururka.
Wax-ka-badal iyo kaabis socotay 48-saacadood, oo xubnaha guud ee ururka ay ku sameeyeen xeerkii ururka, waxa gunaanadkii noqday in 01/May/2024 loo codeeyo xeerkii oo dhameystay kaabis iyo kordhinba, natiijadii codbixinta xeerkuna waxay noqotay sidan:
Sida xeerka ururku dhigayay waa in la qabto shirweynihii 1aad ee ururka, si loo doorto guddidii rasmiga ahayd ee ururka hogaaminaysay muddo 2-sanno ah.
Hadaba si shirweynihii u qabsoomo, waxa is-xilqaamay guddi ka kooban 5-xubnood, oo iyagana shaqadoodu kumeelgaadh ahayd, kuwaasi oo u xil-saarnaa:
- Qabashada codsiyada musharixiinta u tartamaysa guddiyada ururka.
- Qabanqaabinta shirweynaha 1aad ee ururka.
Taariikhdu maalinkii ay ahayd 24-May-2024 ayaa uu qabsoomay shirweynihii 1aad ee ururka Laasdhuure, shirkaasi oo ay ka baxeen guddidii rasmiga ahayd ee hawsha ururka wadaysay, oo ka kooban laba guddi oo kala ah:
- Guddida Fulinta oo ka kooban 5-xubnood
- Guddida Anshaxa iyo La-xisaabtanka oo ka kooban 5-xubnoon
Gunaanad:
Aniga oo ah guddoomiyihii ururka Laasdhuure, waxaan u mahadnaqayaa dhamaan xubnaha ururka, iyo cid kasta oo ka soo qaybqaadatay socodsiinta hawshan kheyriga ah, ee aynu ugu adeegayno reerkeena.
Waxa aan si gaar ah ugu sii mahadnaqayaa:
- Dadkii keenay fikirkan togan ee taageerada u ah tolkeen,
- Guddidii 10-xubnood ee kumeelgaadhka ahaa, ee xeerka soo draft-gareeyay,
- Guddidii 5-xubnood ee kumeelgaadhka ahaa, ee ka shaqeeyay qabanqaabintii shirweynaha 1aad iyo qabashadii doorashada guddida rasmiga ah,
- Qurbe-joogtii soo bixisay lacagtii ku baxday shirweynihii 1aad,
- Iyo dhamaan xubnihii ka soo qaybgalay shirweynaha, kana qaybqaatay codeyntii doorashada guddida rasmiga ah.
Waxa aan Illaahay ka baryaya inuu annagana nagu asturo xilkaa culus ee aad na saarteen.
Wa Bilaahi Tawfiiq.
